لوما عنا لي صاحبي باعني له = بقطع على شآنه طوال المسافات
ماني مدور في البدايل بديله = وماهو بيسمع بي حاسد وشمات
لاطاح من جور الزمان أرتكي له = أرسم على مبدا مطيحه نهايات
صاحبه أنا وشلون ما أحتال أشيله = وأنا وحيد وقاهر لي عصابات
أكتب علي يدين الزمان البخيله = ان البخل ماهو بشح الكرامات
البخل حرمان اليدين الطويله = من كسبة الأفعال في عصر الأصوات
يأست من هذا الزمان وحصيله = لأني تعبت آثور وأستبشر الآت
الماضيات من الليالي الهزيله = لا يمكن انها تصنع المستجدات
تمويت الاحياء في العيون الذليله = صدقني انه مثل تمويت الاموات
لو يرفعك وقت الرخى والرذيله = سبع الاراضي تحت سبع السماوات
حنا خلقنا للرذيله فضيله = نصلح اغلاط الزمن ببتسامات
اليا تجمعنا خذينا الاصيله = واليا بتلينا بالخطى نصبح آفات
رجالنا يسوى لحاله قبيله = استغفر الله لو بقول اننا آيات
ان كانت اغلاطي في حياتي قليله = مجرد انها كلمة عشر غلطات
حرام بك صرف الحروف الجزيله = وحلال في من خصني له ابو الذات
الي ملايكت الحلا تنحني له = عليه من ملح الطفوله علامات
في نظرتي كل الوجيه الجميله = مخلوقه تسوي لوجهه دعايات
ملامحه من غير حكي تحكي له = تفرض علي الي تقوله وبسكات
لو قالت ان الدايره مستطيله = قلت الدواير كلها مستطيلات
يا آخاذ لبات العقول الثقيله = اخذتني كلي ولاقلت لك هات
ليه ارتجي عطفك وليه اشتكي له = والهات في قاموس عشرتك هيهات
حببتني قربك وزاد تعبي له = في جمر عقبه بعد عقبه وعقبات
ختمت قلبي عن عشاشيق جيله = ختم المصلي بالدعى والتحيات
الين جات ليله عن الفين ليله = وصارت حكايه غير كل الحكايات
ذوبتني بين الدماث النحيله= وعلمتني فن الرسم والقياسات
وفجأه كذا بار الخليل بخليله = كله لعين مجمعين العلاقات
شحيت بدمع الرموش الظليله = وقفتني بين الامل والمحاتات
وجدي على قلبي ويا عزتي له = دقات تيأس به وتأمله دقات
ينشد لك حيله وينهدحيله = الحزن خطوه والغرابيل خطوات
إذا الامل رمز القلوب النبيله = انا ميئس منه في كل الاوقات
ان كان شوفت غرتك مستحيله = أكيد لمسك سابع المستحيلات
موضوع: قصيدة للمبدع سعد علوش 
الثلاثاء سبتمبر 08, 2009 1:42 am
